<p style="text-align: justify;">
Претседателот Стево Пендаровски, денеска прими делегација од Хрватскиот сабор, предводена од Домагој Милошевиќ, претседател на Комитетот за европски работи.</p>
<p style="text-align: justify;">
Како што известуваат од кабинетот на претседателот, на средбата биле разменети мислења за билатералните односи меѓу Северна Македонија и Хрватска, при што Пендаровски изразил уверување дека традиционално пријателските релации меѓу двете држави и во иднина ќе се зајакнуваат, преку интензивирање на соработката во сите области од заемен интерес.</p>
<p style="text-align: justify;">
Соговорниците се согласиле дека напредокот на државата во ЕУ и НАТО позитивно ќе се одрази, не само врз внатрешната општествено-политичка состојба во земјата, туку и врз стабилноста и развојот на целиот регион.</p>
<p style="text-align: justify;">
Хрватските пратеници ја реафирмираа безрезервната поддршка на Република Хрватска и изразија уверување дека Европскиот совет ќе одреди датум за почеток на пристапните преговори на Република Северна Македонија, која е пример и светла точка на Балканот, наведуваат во соопштението од Кабинетот на претседателот.</p>
<p style="text-align: justify;">
На средбата се истакнал придонесот на малцинствата од двете држави како регионален пример на искрено пријателство меѓу двете земји.</p>
<p style="text-align: justify;">
Како што соопштуваат, соговорниците разговарале и за економската соработка меѓу двете држави и се заложиле дека во иднина треба да се воспоставуваат нови, заеднички проекти и иницијативи во областа на трговската размена.</p>
Press releases
