<p style="text-align: justify;">
Претседателот на Владата на Република Македонија, Зоран Заев е во официјалната посета на Република Хрватска, придружуван од владина делегација во состав: Кире Наумов, заменик министер за економија, Виктор Димовски, државен секретар во МНР и советници.</p>
<p style="text-align: justify;">
Официјалната посета на Загреб, премиерот Заев ја почна со тет-а-тет средба со неговиот колега, хрватскиот премиер Андреј Пленковиќ, по што следуваа средба на ниво на владините делегации и изјави на двајцата премиери.</p>
<p style="text-align: justify;">
Премиерот Заев во изјавата изрази огромна благодарност до граѓаните на Република Хрватска, до неговиот колега и пријател, премиерот Андреј Пленковиќ, до Владата, за искрената, континуирана и силна поддршка што ја даваат на граѓаните и на Република Македонија, во интегрирањето кон ЕУ и НАТО.</p>
<p style="text-align: justify;">
Претседателот на Владата, Заев ја посочи како значајна поддршката од пријателска Хрватска во Советот на ЕУ летото, како и во НАТО интеграцијата, и повика таа да продолжи и во иднина.</p>
<p style="text-align: justify;">
- Во Македонија се донесоа важни одлуки. Верувам дека до крајот на јануари Парламентот ќе даде поддршка на Договорот со Грција, по што ќе следува и поддршка на Договорот и од страна на Грција, како и на протоколот за членство на Македонија во НАТО. Веруваме дека Хрватска ќе биде една од првите земји што ќе го потпише протоколот за членство на Македонија во НАТО. И дека Македонија ќе биде 30-та земја членка на НАТО. Имаме договор и со Бугарија. Правиме реформи во правосудството, медиумите, јавната администрација, борбата против криминалот и корупцијата. Очекуваме дека ќе почнеме преговори во јуни со ЕУ. Оваа посета на Хрватска е само уште една силна порака за големото пријателство меѓу двете земји, рече премиерот Заев.</p>
<p style="text-align: justify;">
Премиерот Андреј Пленковиќ ги поддржа храбрите политики на премиерот Заев и Владата, што конечно отвораат пат кон заслужените ЕУ и НАТО интеграции и најави целосна поддршка од Хрватска во овие процеси.</p>
<p style="text-align: justify;">
Тој рече дека премиерот Заев и Владата изминатите месеци направиле низа храбри одлуки што ќе се одразат со формално членство во НАТО и отворање на преговорите со ЕУ во јуни. Премиерот Пленковиќ рече дека Хрватска ќе се заложи за подинамичен преговарачки процес, за Македонија во ЕУ интеграциите да го надополни пропуштеното.</p>
<p style="text-align: justify;">
На средбата на ниво на владини делегации се разговараше за актуелни политички прашања во двете земји и за можностите за интензивирање на економската соработка и зголемување на трговската размена. Премиерот Заев во изјавата и директно ги повика хрватските компании да инвестираат во Македонија.</p>
<p style="text-align: justify;">
Претседателот на Владата Заев и владината делегација, ја продолжуваат официјалната посета на Хрватска со средби со хрватската претседателка на државата, Колинда Грабар - Китаровиќ и со претседателот на Собранието на Република Хрватска, Гордан Јадроковиќ.</p>
<p style="text-align: justify;">
Утре, претседателот на Владата на Република Македонија, Зоран Заев и владината делегација што ќе го придружува, ќе учествуваат на Самитот на шефови на влади на земјите од Централно Европската Иницијатива (CEI).</p>
<p style="text-align: justify;">
(<a href="https://vlada.mk/node/15974">https://vlada.mk/node/15974</a>)</p>
Press releases
