<p style="text-align: justify;">
„Проектот СИАРС кој влијае на подобрување на борбената готовност, но и можноста за спасување на животи во екстремни околности покажува дека Република Македонија има што да и понуди на НАТО – алијансата и може да соработува со НАТО земјите-членки на исто ниво“, рече министерката за одбрана Радмила Шекеринска на денешното отворање на работилницата за проектот СИАРС во Скопје.</p>
<p style="text-align: justify;">
Проектот е реализиран од Воената академија и академските институции како Факултетите за електротехника и за медицина од Љубљана и ФИНКИ од скопскиот универзитет „Св. Кирил и Методиј“, а поддржан од НАТО програмата за наука и мир. Неговата цел е развој на технологии за пренесување на виталните знаци за живот на војниците на бојното поле до медицинските тимови, во реално време.</p>
<p style="text-align: justify;">
На отворањето министерката Шекеринска посочи дека со овој систем за трансфер на витални физиолошки информации, без сомнение ќе се намалат ризиците по војниците и ќе се зголеми бројот на спасени животи. „Целта е навистина благородна. Оние кои го ризикуваат својот живот за нашата безбедност, заслужуваат да се потрудиме и да направиме сè за да го намалиме ризикот што е можно повеќе, ја заслужуваат нашата посветеност да создадеме услови својата работа да ја извршат брзо, ефикасно и што е можно побезбедно“, рече Шекеринска. Додаде дека со овој проект кој обединува поголем број институции, се покажува дека Македонија работи напорно на својата стратешка цел – членството во НАТО, зашто „членството во Алијансата не е само воена цел на Република Македонија, туку тоа е голем плус и за академиските институции, за нашите истражувачи и експерти, и голема предност за унапредување на македонската технологија и иновативните решенија“.</p>
<p style="text-align: justify;">
Директорот на проектот, Јанез Тротељ им се заблагодари на организаторите и на истражувачкиот тим од словенечките и македонските факултети. „Учесниците на овој проект се одлични научници. Сите бевте целосно посветени во заедничката работа и достигнавте одлични резултати“, рече тој. Посочи дека бил позитивно изненаден од посветеноста и ентузијазмот на младите македонски истражувачи, за кои рече дека завршиле одлична работа.</p>
<p style="text-align: justify;">
Амбасадорите на Хрватска и на Словенија, Данијела Баришиќ и Милан Јазбец истакнаа дека овие земји даваат недвосмислена поддршка за членството на Македонија во Алијансата. Амбасадорот Јазбец рече дека ова е интердисциплинарен проект со повеќедимензионална порака, пример дека Македонијаима што да и понуди на Алијансатa. Амбасадорката Баришиќ посочи дека НАТО значи и демократија, владеење на правото, технологија и наука. „Владата на Македонија има волја и сила да ги спроведе реформите за стратешката цел – членство во НАТО и Хрватска ќе ви помогне да ги достигнете целите, што е добро за вас, за регионот, за НАТО и за Европската Унија“ рече Баришиќ.</p>
<p style="text-align: justify;">
Деканот на Воената академија, полковникот Орце Поповски порача дека Академијата има богата историја во проектите базирани на истражувања кои ја обликуваат нашата визија за подобрување на образовниот процес и изнаоѓање на платформи за нови идеи и иновации. Тој рече дека Воената академија е дел од четири научни проекти финансиски поддржани од НАТО – програмата за мир и безбедност и ова е еден од тие проекти.</p>
<p style="text-align: justify;">
(<a href="http://morm.gov.mk/?mainnews=siars-naucen-proekt-za-namalen-rizik-na-bojnoto-pole&lang=mk">http://morm.gov.mk/?mainnews=siars-naucen-proekt-za-namalen-rizik-na-bojnoto-pole&lang=mk</a>)</p>
<p style="text-align: justify;">
</p>
<p>
</p>
Press releases
