Kryetari i Parlamentit Kroat, Gordan Jandroković, në vizitë zyrtare në Shqipëri

Kryetari i Parlamentit Kroat, Gordan Jandroković, zhvilloi një vizitë zyrtare në Republikën e Shqipërisë më 8 dhe 9 qershor 2026, gjatë së cilës u takua me Presidentin e Republikës së Shqipërisë, Bajram Begaj, Kryetarin e Kuvendit, Niko Peleshi, si dhe Kryeministrin Edi Rama.
Gjatë takimeve u konfirmua niveli i lartë i marrëdhënieve dypalëshe ndërmjet Kroacisë dhe Shqipërisë, të cilat bazohen në miqësinë e gjatë, aleancën në NATO dhe përkushtimin e përbashkët ndaj vlerave evropiane. Bashkëbiseduesit shprehën kënaqësinë për zhvillimin e vazhdueshëm të bashkëpunimit politik, si dhe për forcimin e lidhjeve ekonomike, kulturore dhe ndërnjerëzore ndërmjet dy vendeve.
Vëmendje e veçantë iu kushtua procesit të zgjerimit të Bashkimit Evropian dhe perspektivës evropiane të vendeve të Evropës Juglindore. Kryetari Jandroković përgëzoi Shqipërinë për përparimin e rëndësishëm të arritur në negociatat e anëtarësimit me Bashkimin Evropian, duke theksuar se rezultatet e arritura dëshmojnë përkushtimin e institucioneve shqiptare ndaj reformave dhe integrimit evropian. Ai ritheksoi se Kroacia do të vazhdojë të mbështesë fuqishëm Shqipërinë në rrugën e saj drejt Bashkimit Evropian, duke ndarë përvojën e fituar gjatë procesit të vet të anëtarësimit.
Në bisedën me Presidentin e Republikës, Bajram Begaj, vëmendje e veçantë iu kushtua bashkëpunimit në fushën e mbrojtjes. U theksua rëndësia e Deklaratës Trepalëshe për Bashkëpunimin në Mbrojtje ndërmjet Kroacisë, Shqipërisë dhe Kosovës si një kontribut i rëndësishëm për sigurinë rajonale dhe ndërveprueshmërinë e aleatëve. Gjithashtu u shkëmbyen mendime mbi bashkëpunimin ekonomik, turizmin, lidhjet e transportit dhe projektet energjetike me rëndësi strategjike për rajonin, përfshirë Korridorin Adriatiko-Jonian, Gazsjellësin Joniano-Adriatik si dhe projektet LNG në Kroaci dhe Shqipëri. U diskutua gjithashtu mbi zhvillimet aktuale gjeopolitike dhe sfidat e sigurisë në Evropë dhe rajon, duke theksuar rëndësinë e bashkëpunimit brenda NATO-s dhe veprimit të përbashkët për ruajtjen e stabilitetit në Evropën Juglindore.
Me Kryetarin e Kuvendit, Niko Peleshi, u konfirmuan marrëdhëniet e shkëlqyera dhe miqësore ndërmjet dy vendeve, të bazuara në vlera dhe interesa të përbashkëta. U theksua rëndësia e forcimit të mëtejshëm të bashkëpunimit parlamentar përmes kontakteve më të shpeshta në të gjitha nivelet, përfshirë bashkëpunimin ndërmjet komisioneve parlamentare dhe shërbimeve profesionale të dy parlamenteve. Gjithashtu u diskutuan mundësitë për avancimin e bashkëpunimit ekonomik, veçanërisht në fushat e energjisë, infrastrukturës, turizmit, digjitalizimit dhe industrisë së mbrojtjes. Kryetari Jandroković vlerësoi përparimin e Shqipërisë në rrugën drejt anëtarësimit në Bashkimin Evropian dhe ritheksoi mbështetjen e plotë të Kroacisë për përfundimin e negociatave të anëtarësimit, për çka Kryetari Peleshi shprehu mirënjohjen e tij.
Gjatë bisedës me Kryeministrin Edi Rama u konfirmuan marrëdhëniet miqësore dhe bashkëpunimi shumë i mirë dypalësh ndërmjet Kroacisë dhe Shqipërisë. Bashkëbiseduesit theksuan se takimet e shumta të nivelit të lartë gjatë viteve të fundit dëshmojnë forcimin e vazhdueshëm të marrëdhënieve ndërmjet dy vendeve. Kryeministri Rama prezantoi zhvillimet më të fundit lidhur me negociatat e anëtarësimit të Shqipërisë në Bashkimin Evropian, ndërsa Kryetari Jandroković përgëzoi Shqipërinë për progresin e jashtëzakonshëm të arritur në rrugën e saj evropiane dhe theksoi se Kroacia do të vazhdojë të ofrojë mbështetje përmes ndarjes së përvojës së saj nga procesi i anëtarësimit në Bashkimin Evropian. Gjithashtu u diskutua për stabilitetin dhe perspektivën evropiane të Evropës Juglindore, si dhe për rëndësinë e forcimit të lidhjeve të transportit ndërmjet Kroacisë dhe Shqipërisë, veçanërisht përmes linjave ajrore, si një parakusht për zhvillimin e mëtejshëm të bashkëpunimit ekonomik dhe turistik.
Vizita zyrtare e Kryetarit të Parlamentit Kroat konfirmoi edhe një herë marrëdhëniet e shkëlqyera ndërmjet Kroacisë dhe Shqipërisë, si dhe përkushtimin e përbashkët për forcimin e bashkëpunimit, stabilitetit dhe perspektivës evropiane të Evropës Juglindore.

News